TINUTUGIS na ng mga awtoridad ang pitong miyembro ng kilabot na akyat bahay gang na pumaslang sa businessman matapos looban sa Quezon City kaninang umaga.
Inatasan noon din ni QCPD Director Chief Supt. Richard Albano ang hepe ng Galas Police Station 11 na si P/Supt. Norberto Babagay na agad hulihin ang mga kawatan na pumaslang sa trader na si Edward Choy, 57, ng 39 Dona Hemady St., New Manila, Brgy. Mariana, QC.
Si Choy ay idineklarang dead on–arrival sa St. Lukes Medical Center dahil sa mga tama ng bala sa mukha at katawan.
Ayon sa ulat ng Quezon City police, alas-6:00 ng umaga nang pasukin ng pitong miyembro ng akyat bahay ang bahay ni Choy sa New Manila, Brgy. Mariana.
Sa pahayag ng misis ng biktima sa pulisya, nasa kusina siya nang marinig ang pakikipagtalo sa mga suspek ng kanyang mister habang nasa sala.
Ilang saglit pa ay nakarinig siya ng mga putok ng baril at nakitang nakahandusay na si Choy.