PATAY ang isang retiradong pulis at umano’y tulak ng shabu nang parusahan ng kamatayan ng isang yunit ng Celso Minguez Command-New People’s Army-Sorsogon.
Ginawaran ng kamatayan si SPO1 Virgilio Miguel Garra sa Brgy. Gadgaron, Matnog, Sorsogon nitong Hulyo 24, 2013 ganap na alas-6:45 ng umaga.
Ayon kay Samuel Guerrero, tagapagsalita ng CMC-NPA, masugid na intel ng Philippine National Police at ng Military Intelligence Group si Garra mula nang nasa serbisyo pa siya ng PNP, hanggang sa siya’y magretiro na.
“Aktibo siyang naglatag ng mga Barangay Intelligence Network sa mga bayan ng Matnog, Bulan at Magallanes para labanan ang rebolusyonaryong kilusan,” ayon sa pahayag ni Guerrero.
Dagdag pa ni Guerrero: “Sa panahon ng kanyang pagretiro, direkta siyang nagre-report bilang ahenteng paniktik sa Commanding Officer ng 31st Infantry Battalion.”
Aniya, may malubhang pananagutan din si Garra sa pagpapasurender ng dalawang mandirigma ng Celso Minguez Command noong dekada 90 at 2006.
Kabilang din umano sa kanyang krimen sa mamamayan ay ang pagiging dealer ng shabu sa mga bayan ng Matnog, Bulan, at Magallanes.
Matagal nang inirereklamo ng mga magulang, guro at maging ng mabubuting alagad ng batas ang garapal na pagsu-supply ni Garra ng ilegal na droga sa mga komunidad, paaralan, at mga opisina, sabi ni Guerrero.
Ang mga drug pusher na kanyang kontrolado sa mga bayang nabanggit ay nagsisilbi ring mga asset niya sa paniniktik.
Nagbabala ang Celso Minguez Command sa mga dealer at pusher ng ilegal na droga sa probinsya, lalo na yaong mga nasa hanay ng militar at pulisya, na lalabanan ng CMC ang mga sagad-sa-butong masasamang elemento na sumisira sa buhay at kalusugan ng mamamayang Sorsoganon.
The post Ret. pulis na tulak ng shabu at masugid na intel, dedo sa NPA appeared first on Remate.