TILA otso pesos lamang ang halaga ng buhay ng 48-anyos na construction worker nang barilin ng isang ginang makaraang hablutin ng una ang barya sa mesa na bahagi ng pusta sa paglalaro ng tong-its ng suspek sa Taguig City.
Dead on the spot ang biktimang si Rolando Haloc, 48, ng Ibayo Tipas sanhi ng tinamong tama ng bala sa katawan habang mabilis na tumakas ang suspek na si Lailani Barreta, naninirahan sa Ibayo-Ususan, bitbit ang ginamit na armas.
Sa isinagawang imbestigasyon, kalaro ng suspek ang kanyang mga kaanak ng tong-its sa harapan ng kanilang bahay nang dumating ang biktima na mistulang nakainom ng alak ala-1:10 ng hapon.
Sa hindi malamang dahilan ay hinablot ni Haloc ang P8 na barya na taya sa gitna ng mesa bago mabilis na umalis patungo sa bahay ng hipag sa naturan ding lugar.
Nabastusan ang ginang at mga kalaro sa ginawa ni Haloc kaya’t kasama ang mga kaanak, nilusob nila ang bahay na pinuntahan ng biktima, pinagbabato at pilit na pinalalabas ang lalaki.
Nang lumabas si Haloc, pinagmumura at inundayan pa ng suntok ng isang kaanak ni Barreta.
Hindi naman nanlaban ang biktima sa pangambang lalo siyang kuyugin ng mag-anak kaya’t ipinasya na lamang umalis subalit hindi pa nakakalayo ay binaril na siya ng suspek.
The post Kelot utas sa P8 barya sa Taguig City appeared first on Remate.