TIGBAK ang isang 17-anyos na binatilyo na witness sa isang murder case makaraang itumba ng riding-in-tandem habang padalo sa kanilang hearing sa Quezon City kaninang umaga, Hunyo 24, Martes.
Kinilala ni Supt. Ariel Capucao, hepe ng Quezon City Police District Station 3 (QCPD-S3)- Talipapa ang biktima na si Miguel Garcia, binata, ng 22 Mariposa St., Brgy. Gulod, Novaliches, QC.
Hindi na naisalba ang buhay ni Garcia sa Bernardino Hospital dahil sa isang tama ng bala sa kaliwang ulo.
Ayon kay SPO1 Harry Budomo, naganap ang insidente sa kahabaan ng Quirino Highway malapit sa kanto ng J. Ramoy St., Brgy. Talipapa, QC dakong 9:15 ng umaga.
Ayon sa ulat, sakay ng isang pampasaherong jeep ang biktima kasama ang kanyang ina na si Estrelita Garcia, 49, at witness na si Elvie Magcalas, 33, na biyaheng Blumentritt nang barilin ng dalawang hindi nakilalang salarin sakay ng motorsiklong walang plaka.
Nabatid sa ulat na dadalo sana sa hearing ang biktima kasama ang kanyang ina sa Caloocan City court para tumestigo sa isang kaso ng pagpatay laban sa isang pulis Caloocan na suspek sa pamamaril sa kanyang kapatid nitong nakaraang buwan.
Habang nasa biyahe, binaril ng isa sa mga suspek ang biktima saka mabilis na tumakas na ngayo’y pinaghahanap na.
The post Dadalo sa hearing, witness sa murder case itinumba appeared first on Remate.