DAHIL sa masangsang na amoy ay nadiskubreng patay na ang isang seaman sa kanyang tinutuluyang apartelle sa Malate, Manila, kagabi.
Kinilala ang biktimang si Nestor Gentoral, 55-anyos, taga-Nueva Valencia, Guimaras, at pansamantalang nanunuluyan sa Marabella Apartelle sa Mabini, Malate.
Nabatid sa ulat ng MPD-Crime Against Persons Investigation Section, nakaamoy ng masangsang ang naka-check in sa kalapit nitong silid, kaya agad na ipinagbigay alam sa front desk ng nasabing apartelle.
Ayon kay Randy Acupan, cashier ng apartelle, nag check-in ang biktima nitong nakaraang Pebrero 28, at huli itong nakitang buhay noong Marso 6 habang nanonood ng telebisyon sa hallway ng apartelle.
Sa imbestigasyong isinagawa ng pulisya, regular naman umanong kustomer ang biktima at Biyernes ng gabi, tinawagan umano ng roomboy na si Ernel Vicente, ang biktima nang paulit-ulit, pero walang sumasagot, kaya pinuntahan na nila bitbit ang duplikadong susi, at dito tumambad ang biktima na wala nang buhay at nangangamoy na.
Wala namang anumang galos na nakita sa katawan ng biktima na palatandaan na may foul play sa pagkamatay nito.