DEDO ang isang estudyante habang sugatan ang dalawa pa nang araruhin ng isang van habang naghihintay ng masasakyan sa Tondo, Maynila.
Isa dito ang binawian ng buhay sa Jose Reyes Memorial Medical Hospital na nakilalang si Faye Nikka Bautista, 20, estudaynte, at taga-1071 Batangas St., Tondo.
Sugatan naman ang dalawa pang sina Erica May Gabriel, 21, estudyante, ng 1356 Lardizabal St., Sampaloc, Manila, at Joseph Ocol, 22, estudyante, taga-1065 Batangas St., Tondo sanhi ng mga sugat sa katawan.
Sinampahan ng kasong reckless imprudence resulting in homicide, multiple physical injuries at damaged to property ang driver ng van na si Michael Enriquez.
Ayon kay SPO2 Bert Francisco ng Manila Traffic Bureau, dakong 11:00 ng gabi nang naganap ang insidente sa Honorio Lopez Blvd. malapit sa panulukan ng Dalaga St., Gagalangin, Tondo.
Nabatid na minamaneho ni Enriquez ang Mitsubishi Canter at pagsapit sa kahabaan ng Honorio Blvd at Dalaga St. ay nawalan umano ito ng kontrol dahilan para araruhin ang mga biktima na noo’y nakatayo lamang sa kalsada at nahihintay ng masasakyan.
Sa lakas na impact ay pumailalim si Bautista bago humampas sa likurang bahagi naman ng trailer truck na nakaparada sa lugar.
Mabilis namang dinala sa nabangit na pagamutan ang biktima ngunit hindi na naisalba pa. JOCELYN TABANGCURA-DOMENDEN