DALAWANG lalaki ang pinagbabaril hanggang sa mamatay sa Dimasalang Street, Maynila, Sabado ng umaga.
Hinala ng pulisya, biktima ng summary execution ang dalawang lalaki na ang isa ay inilarawan nasa edad na 20 hanggang 25-anyos, habang nasa 42 hanggang 48-anyos naman ang isa.
Kapwa may mga tattoo sa katawan, naka-duct tape sa likod ang mga kamay at pareho ring may tama ng baril sa mukha hanggang leeg.
Ayon kay SPO1 Charles John Duran, dakong alas-3:00 ng madaling araw nang mapansin ng isang batang lalaki mula sa kabilang bahagi ng kalsada ang pagdating ng isang kulay maroon na kotse.
Nagtulong umano ang dalawang lalaki na ibaba ang dalawang lalaki na nakagapos ang kamay sa likod.
Nagtangka pang manlaban ng isang biktima ngunit binaril ito at namatay.
Makailang ulit namang pinagbabaril ang isa pang biktima.
Matapos ang pamamaril ay ay agad na humarurot ang naturang sasakyan.
Inaalam pa ng pulisya kung may CCTV camera sa lugar upang matukoy ang nasa likod ng pamamaslang sa mga biktima.