HUMANTONG sa isang malagim na trahedya ang simpleng pagse-selfie at pamamsyal ng magkakaibigan nang malagas ang walo sa kanila kabilang ang dalawang paslit matapos tumaob ang kanilang sinasakyang bangka sa isang palaisdaan sa Binangonan, Rizal nitong Linggo ng hapon.
Sinabi ni Noli Celestro ng Binangonan Provincial Disaster Risk Reduction and Management Office (BPDRRMO), na ang mga namatay sa pagkalunod ay nakilalang sina Neymaret Mendoza, Malou Gimena, Marilou Barbo Papa, Frederick Orteza, Weldie Pareno, Roleno Pareno, Sean Wilfred Orteza, 6-anyos at si Jajannah Jensom Parseno, 2-anyos.
Lima lamang sa mga pasahero ang nasagip na nakilalang sina Grace Parena, Merlita Hominez, Gerson Decreto, Joash Pareno, 10, at Maxine Orteza, 7.
Sa ulat, naganap ang insidente pasado ala-1:25 p.m. sa isang palaisdaan sa Laguna Lake na malapit sa boundary ng Binangonan.
Bago ito, sumakay ang mga biktima sa bangka para mag-ikot-ikot sa Laguna Lake na kilalang may mga palaisdaan.
“Ayon sa kwento ng bangkero na hindi nakuha ang pangalan, ‘yung mga pasahero niya nagkukuha ng picture, nagseselfie-selfie. ‘Yung bigat napunta du’n sa lugar na walang katig, kaya tumaob ang bangka.”
Naniniwala ang pulisya na na-trap ang mga biktima sa pagitan ng bangka at burak kaya hindi nagawang makalangoy paitaas ng lawa.
Nabatid pa na walang suot na life vest ang mga biktima nang maganap ang insidente at nabatid pa na ang lahat ay lumagda sa isang affidavit na hindi nila maidedemanda ang operator sakaling magkaroon ng aksidente.
“Siguro may pagkukulang din ‘yung operator ng bangka. Hindi niya nabigyan ng briefing ‘yung pasahero niya. Isa pa sa nangyari du’n, walang mga life vests na kailangang-kailangan ‘pag bibiyahe tayo sa tubig,” pahayag ni Celestro. BOBBY TICZON