SWAK sa kulungan ang isang pekeng pulis makaraang madakip ng mga awtoridad dahil umano sa pagnanakaw ng kotse, illegal drugs at illegal possession of firearms sa Fairview, Quezon City kahapon ng umaga Abril 3, 2018 (Martes).
Kinilala ni Quezon City Police District Director Police Chief Supt. Guillermo Lorenzo T. Eleazar ang nadakip na suspek na si Norberto Bernalez, 36, tubong Olongapo City at residente ng No. 3 Log-V Cluster 2, 4th Floor, Unit 6, Smile Citi-Homes Annex, Brgy. Kaligayahan,QC.
Ayon kay Eleazar nadakip ang suspek dakong 9:00 ng umaga nitong nakalipas na Abril 3, 2018 (Martes) sa Bristol St., Brgy. Greater Fairview, QC.
Nabatid sa ulat na ipinagharap ng reklamo ang suspek ng complinant na si Kevin Aquino ng Brgy.Culiat,QC sa tanggapan ng QCPD-District Special Operations Unit (DSOU) nitong nakalipas na Abril 2, 2018 matapos umanong tangayin ang kanyang Toyota Vios na nakapangalan sa kanyang tiyahin na si Marvic Joseph Roxas.
Namataan umano ang ninakaw na sasakyan sa Brgy. Fairview, QC dahilan para humingi ito ng tulong sa mga operatiba ng QCPD-DSOU sa pamumuno ni Supt. Rogarth B. Campo.
Ayon sa ulat matapos mamataan ang ninakaw na kotse sa naturang lugar agad humingi ng tulong ang complinant sa mga pulis at nagtungo sa naturang lugar habang tinatahak ng mga ito ang Bristol St.,Brgy. Brgy. Greater Fairview namataan ng mga ito ang naturang sasakyan habang minamaneho ng suspek at pinahinto ng mga pulis.
Pagsapit umano sa kahabaan ng Sultan St., corner Ascension Avenue agad pinababa ang driver ng kotse na si Bernaldez, subalit nagpakilala ang huli na isang pulis at nagpakita pa umano ng PNP Badge subalit wala naman itong maipakitang PNP identification card.
Kaya agad dinakip ng mga pulis ang suspek at nakumpiska dito ang isang cal. .45 Norinco pistol kasama ang pitong bala na walang kaukulang lisensya, PNP ball cap, badge at traffic vest, apat na sachets ng shabu at drug paraphernalia at ang umano’y ninakaw na dark brown Toyota Vios (AJA-1828). SANTI CELARIO