LUMUBOG ang isang bangka sa karagatang sakop ng Catbalogan, Samar kagabi kung saan nasagip ang 20 pasahero nito ng mga tauhan ng Philippine Coast Guard (PCG).
Ayon sa ipinarating na ulat ng PCG Catbalogan sa tanggapan ng PCG-main (Manila), patungo sa Catbalogan ang naturang bangka mula sa Daram, Samar nang magkaaberya pasado alas-6 ng gabi.
Dahil malapit na sa daungan ng Catbalogan ang bangka kaya agad na nakahingi ng tulong ang isa sa mga sakay nito sa mga tauhan ng coast guard Catbalogan.
Mula sa nasabing bilang ng nailigtas, kabilang dito ang isang taong gulang at apat na taong gulang na mga bata.
Nabatid na hinampas ng malalaking alon ang bangka kaya pinasok ng tubig hanggang tuluyang lumubog.
Pawang mga nasaaayos nang kondisyon ang mga pasahero na dumaan sa pagsusuring medikal.
Lumitaw naman sa imbestigasyon ng PCG na overloaded ang bangka dahil nasa 10 katao lamang ang kapasidad nito o maaring maisakay.
Pinag-aaralan na rin ng PCG kong may pananagutan ang operator ng bangka. JOCELYN TABANGCURA-DOMENDEN