NAGPAALALA ang Commission on Elections (Comelec) sa Philippine National Police (PNP) kaugnay ng tamang paglalagay ng mga checkpoints kasabay na rin nang pagsisimula na kahapon ng nationwide gun ban, para sa nalalapit na pagdaraos ng Barangay at Sangguniang Kabataan (SK) elections sa Mayo 14.
Ayon kay Comelec Spokesman James Jimenez, ang mga checkpoints ay kailangang nakapwesto sa mga lugar na may sapat na ilaw upang kaagad silang makikita ng publiko.
Dapat din aniyang may malaking plakard at makikita ang nakasulat na “COMELEC Checkpoint.”
Dapat ring mababasa ng malinaw ang pangalan at numero ng election officer at station commander na in-charge doon.
Dagdag pa ni Jimenez, kailangan din na naka-uniporme ang mga pulis na nagbabantay sa bawat checkpoint at pawang “plain view” o “visual search” lamang ang isasagawa ng mga ito.
Ang gun ban ay awtomatikong ipinatutupad kasabay nang pagsisimula ng election period sa bansa, na nagsimula na kahapon at magtatapos sa Mayo 21. MACS BORJA