WALANG buhay ng matagpuan ang isang security guard sa loob ng bangko nitong binabantayan Lunes ng hapon, April 16 sa Malabon City
Kinilala ni Malabon police Insp. Ferdinand Espiritu ang biktima na si Virgilio Isales, 39 ng B L-21 Phase 3 E-1 Dagat-Dagatan, Caloocan City.
Batay sa isinagawang imbestigasyon ni PO2 Rockymar Binayug, dakong alas-3:45 ng hapon, nagtungo si Gloryann Santillana, 29, empleyado ng United Coconut Planters Bank (UCPB) branch operation officer na matatagpuan sa M. H Del Pilar, Brgy. Tugatog at nakita nito si Isales na nakahandusay sa loob.
Tinawag nito ang biktima subalit hindi ito tumutugon kaya tinawagan nito si Anna Chico, 33, sales officer ng UCPB na may hawak ng duplicate na susi ng UCPB bago humingi ng tulong kay Joey Matangihan, Public Safety Management Office (PSTMO).
Sinubukang buksan ni Chico ang main door gamit ang duplicate na susi subalit nakakandado ito sa loob kaya inatasan na nito si Matangihan na sirain ang pinto.
Pagdating ng mga tauhan ng Malabon rescue, nirevive ng mga ito ang biktima ngunit hindi ito tumutugon kaya mabilis itong isinugod sa MCU hospital subalit hindi na ito umabot ng buhay.
Hinihintay pa ang resulta sa autopsy examination sa bangkay ng biktima upang matukoy ang tunay na dahilan ng pagkamatay nito. ROGER PANIZAL