KALUNOS-lunos ang sinapit ng isang 30 anyos na tambay makaraang pagbabarilin at tamaan ng dalawang beses sa ulo. Hindi pa nakuntento ang salarin at pinagtataga pa ito kahapon ng umaga sa Malate, Manila.
Kinilala ang biktima na si Jobeth Jaurigue Y Bautista, binata, ng 1212 Meding St., Malate. Mabilis namang tumakas ang itinuturong suspek na nakilala lamang sa alyas “Lito” na umano’y residente sa isang lugar sa Tuazon St., sa Malate.
Batay sa ulat na isinumiti ni Det.Glenzor Vallejo kay P/Insp.Steve Casimiro,hepe ng Manila Police District-Crime Against Persons Investigation Section, dakong 6:10 ng umaga, nang maganap ang nasabing insidente sa gilid ng creek sa panulukan ng Tuazon at Arellano Avenue sa Malate.
Bago ang naturang insidente, nagkaroon ng mainitang pagtatalo sa pagitan ng biktima at ng ilan nitong kaibigan sa Meding St. Nang lumapit ang nasabing suspek at pagsapit sa bandang likuran ng grupo ni Jaurigue, nagpaulan ito ng bala. Wala naman umanong tinamaan kahit isa sa mga ito.
Dahil dito, inalam ni Jaurigue kung sino ang maygawa ng pamamaril sa kanila. Biglang na lamang sumulpot ang suspek saka binaril ang biktima sa ulo ng dalawang beses.
Napag-alaman na bukod sa tama ng bala sa ulo at sa dibdib, may tama din ito ng taga sa mukha, saka iniwan itong nakahandusay na wala ng buhay.
Blanko naman ang ilang residente malapit sa insidente, kaya patuloy ang isinasagawang imbestigasyon upang malutas ang nasabing kaso.