TINAMBANGAN at pinatay ang isang barangay tanod habang tinamaan ng ligaw na bala ang isang binatilyo kagabi sa Malate, Maynila.
Kinilala ang biktima na si Ariel Que, 40, ng M. Adriatico St., Malate,barangay tanod Barangay 204 Zone 77, District 5 habang patuloy na inoobserbahan sa Ospital ng Maynila ang batang biktima na si Jude Anthony Tomnog, 13, ng 2915 Madre Ignacia St sa Malate.
Sa naturang insidente, nakatakas ang suspek na si Sorab Vallo, nasa edad na mula 20 hanggang 25, may taas na mula 5’5 hanggang 5’7 at nakatira rin sa nabanggit na lugar.
Sa report ni SPO2 Glenzor Vallejo ng MPD homicide, alas-7:00 kagabi nang tambangan ng suspek ang barangay tanod at nang makitang papalabas ng bahay saka pinaputukan ng sunud-sunod.
Nakita ng anak ng biktima na si Christopher ang insidente kaya agad na sinaklolohan ang kanyang ama at isinugod sa Ospital ng Maynila ngunit idineklara ding patay ganap alas 11:00 ng gabi.
Habang sugatang binatilyo ay nag-iibig naman umano ng tubig nang tamaan ito ng ligaw na bala .
Hinihinalang motibo sa krimen ang ginawang panenermon ng naturang barangay tanod sa nobya umano ng suspek dahil sa palagiang pagtambay sa lugar lalo na umano kung gabi.