HINIHINALANG may kinalaman sa droga ang pamamaslang sa 28-anyos na babae nang pagbabarilin ng mga hindi pa nakikilalang salarin kaninang madaling-araw sa Taguig City.
Namatay habang ginagamot sa Taguig-Pateros District Hospital si Cindy Jama, ng Blk 90 Lot 7 Upper Bicutan, sanhi ng tinamong tama ng bala ng hindi pa batid na kalibre ng baril sa ulo at hita nito.
Sa ulat ng pulisya, alas-3 ng madaling-araw nang maganap ang pamamaslang sa biktima sa Sitio Sagingan, Upper Bicutan.
Kaagad na tumakas ang mga salarin matapos ang pamamaril bitbit ang ginamit na armas.
Ayon sa mga kapitbahay ng biktima, may kinalaman sa ilegal na droga ang naturang pamamaslang dahil kilala umanong sangkot sa sindikato ang napaslang.