TIGOK ang isang tricycle driver matapos itong bugbugin at barilin ng grupo ng kalalakihan habang naghahatid ng pasahero sa Tonsuya, Malabon City Linggo ng gabi June 2.
Dead-on-the-spot sa pinangyarihan si Rosano Encarguez y Fernando, 38, may asawa, ng #88 Villanueva St., cor. Pasco, Tonsuya ng lungsod sanhi ng isang tama bala ng kalibre .45 sa kanang mata.
Sa tulong ng isang traffic enforcer, nadakip at nakilala ang suspek na si Rigie Lopera y Oliveros, 17, binata, ng Damata St., Letre ng nasabing barangay.
Base sa pinagsanib na imbestigasyon nina P02 Christopher Rodriguez at P02 Cle Bejar ng Station Investigation Division (SID) ng Malabon pulis, dakong alas 7:00 ng gabi ng maganap ang insidente sa kalye Lubiran ng naturang barangay.
Base sa pahayag ng saksing si Noe Macapas, 26, nagpahatid siya sa driver ng tricycle. Habang tinatahak ang nasabing lugar, isang pampasaherong jeep na sakay ang mga suspek ang sumusunod sa kanila. Inatasan siya ng mga suspek na tumakas para hindi madamay.
Hindi pa nakalayo si Macapas, bumaba ang mga suspek at agad kinuyog ang driver. Nang pumalag ang bikitma, nagbunot ng baril ang isa sa suspek at malapitang binaril sa kanang mata.
Habang sumasampa sa jeep ang suspek na may hawak ng baril nakita ito ng traffic enforcer na si Reynalodo De Castro kaya agad humingi ng responde sa mga pulis at naharang ang nasabing sasakyan na naging daan para madakip ang salarin.
Narekober ng mga pulis ang kalibre 45 ng suspek na may tatlo live ammunitions.