SINAKSAK sa lalamunan hanggang sa mapatay ang isang 42 anyos na lalaki habang natutulog sa harapan ng kanilang bahay sa Tondo, Maynila kaninang madaling araw.
Hindi na naisalba pa ng mga doctor sa Ospital ng Maynila ang biktimang si Elmer Cruz, may-asawa, ng 1001 Tayabas S., Tondo sanhi ng tama ng saksak sa lalamunan.
Inaalam naman ang pagkakakilanlan sa suspek na tumakas matapos ang pananaksak dala ang ginamit na patalim.
Sa report ni SPO2 Glenzor Vallejo ng Manila Police District (MPD)-homicide section, dakong 4:00 ng madaling araw nang naganap ang insidente sa harapan ng bahay ng biktima.
Nauna dito, sanhi ng init ng panahon ay natulog ang biktima sa harapan ng kanilang bahay gamit ang mono block nang mula sa madilim na bahagi ay sumulpot ang suspek at walang sabi-sabing sinaksak ito sa lalamunan at kaliwang balikat.
Bagama’t may tama ng saksak, nagawa pang tumakbo sa terminal ng tricycle at nagpahatid pa ito kay Almon Gabica, isang tricycle driver, sa ospital subalit namatay din habang ginagamot.
Bagama’t may nakasaksi sa pananaksak, natatakot namang magbigay ng pahayag sa takot sa kanilang buhay.
Inaalam pa ng pulisya ang motibo sa pagpatay.