BILANG na ang mga araw ng mga tinaguriang “hao shao” na umaali-aligid at naglipana sa mga tanggapan sa Bureau of Customs (BOC).
Ito’y makaraang maglapabas ng memorandum si BOC Commissioner Ruffy Biazon hinggil sa naglipanang mga “hao shao” na nagpapanggap na mga empleyado ng ahensiya upang makapaglinlang sa loob.
Sa pinirmahang memorandum ni Biazon na may petsang May 21, 2013 nakasaad dito na huwag tangkilikin o makipagtransaksiyon sa isang tao o grupo na hindi empleyado ng ahensiya o walang “contract of service” sa Bureau o ang tinatawag na “hao shao”.
“You are herby directed not to utilize or engage the services of persons or group of persons who are not organic personnel or have no existing contract of service with the Bureau,” nakasaad sa memorandum.
Sinabi ni Biazon na ang “hao shao” ay isang taong nagpapanggap na empleyado ng Bureau at nakikipagtransaksiyon ng walang kaukulang direktiba o permiso mula sa tangapan ng ahensiya.
Kabilang na, aniya, rito ang mga nagpapanggap na media subalit wala namang lehitimong kina-aaniban na publikasyon.
Kabilang pa sa mahigpit na ipapatupad ay ang “No ID, No Entry” policy kung saan hindi makakapasok ang isang empleyado, contractual o sino mang tao kung wala itong lehitimong Identifiaction Card (ID).
Dagdag pa dito ang pagpapatupad ng isang unified ID system na gagamitin sa transaksiyon sa lahat ng ports.
Tagubilin ni Biazon na ipagbigay alam sa kanyang tanggapan ang nasabing mga “hao shao”.
Epektibo ang nasabing memorandum nitong June 1.