INIIMBESTIGAHAN ng Muntinlupa police ang motibo sa pamamaslang sa 33-anyos na construction worker nang saksakin ng hindi pa nakilalang salarin sa loob mismo ng bahay nito habang mahimbing na natutulog ang biktima kagabi sa Muntinlupa City.
Namatay habang ginagamot sa Alabang Medical Center ang biktimang si Jeremy Sena, 33, sanhi ng isang tama ng malalim na saksak sa likurang bahagi ng katawan.
Ayon kay Muntinlupa police chief Senior Supt. Roque Dela Vega, naganap ang insidente ng pananaksak alas-11:15 ng gabi habang mahimbing na natutulog ang biktima sa loob ng kanilang bahay sa 113 Wawa St., Davao Compound sa Barangay Alabang.
Sa isinagawang imbestigasyon ng pulisya, pinasok ng salarin ang biktima at tinarakan ng patalim sa likod bago mabilis na tumakas.
Nagising naman ang kapatid na biktima na si Maricar, 30 nang dumaing sa sakit ang kapatid kaya’t mabilis niyang isinugod ang biktima sa pagamutan.
Wala namang makitang motibo si Maricar sa nangyaring pamamaslang lalo at wala siyang alam na kaaway ang kanyang kapatid.
Nagsasagawa na ng follow-up operation ang pulisya para sa makilala at madakip ang salarin na pumaslang sa biktima.
The post Kelot sinaksak habang natutulog sa Muntinlupa appeared first on Remate.