PATAY ang isang 16-anyos na pedicab driver nang saksakin ng kanyang “bestfriend” kagabi sa Sta. Ana, Maynila.
Naisugod pa sa Sta. Ana Hospital ang biktimang si Regino Gardon, ng 502 Sampaguita St., Bulkan Sta. Ana, Maynila ngunit namatay rin habang ginagamot sanhi ng saksak sa katawan.
Pinaghahanap naman ng pulisya ang suspek na nakilala lamang sa alias Kulot, 17, ng Water Lily St., Bulkan Sta. Ana, Manila na tumakas matapos ang pananaksak.
Ayon kay SPO2 Milbert Balingan ng Manila Police District (MPD)-homicide section, dakong alas-8:30 ng gabi nang maganap ang insidente sa Posadas St., Sta. Ana, Manila.
Nabatid matalik na magkaibigan ang dalawa. Pinayuhan ng biktima ang suspek na huwag turuan ang mga bata na gumamit ng solvent na ikinagalit ng huli.
Ang tampuhan ng dalawa ay nauwi sa mainitang pagtatalo kung saan unang nasaksak ng biktima ang suspek.
Nakatiyempo naman ang suspek na gumanti sa biktima at pinagsasaksak ito ng limang ulit sa iba’t ibang bahagi ng katawan.
Isinugod sa ospital ang biktima pero makalipas ang ilang oras ay binawian na rin ng buhay.
The post Pedicab driver sinaksak ng best friend, todas appeared first on Remate.