KRITIKAL ang kalagayan ng isang binatilyo matapos itong pagtulungang bugbugin at saksakin ng tatlong kalalakihan sa Brgy. San Jose, Navotas City kaninang madaling-araw.
Inoobserbahan sa Tondo Medical Center si Ronald Castro y Samson, 17, ng #963 Policarpio St. San Jose ng lungsod sanhi ng tinamong mga bugbog at saksak sa katawan
Dalawa sa suspek ang arestado na nakilalang sina Alfredo Delgado Malela alyas ‘Bongbong’, 25, at si Den Albert Ogad, 19, kapwa taga Los Martirez St. habang si Philip Villar, minor age, ng Tuazon St., ng nasabi ring barangay ay nakatakas.
Ayon sa ulat, dakong ala-1:30 ng madaling-araw naganap ang insidente sa kahabaan ng Tuazon St., ng naturang barangay.
Base sa pahayag ng saksing si Jerald Castor, 19-anyoa magkasama silang naglalakad ng biktima at pagsapit sa nasabing lugar bigla na lamang hinarang ng mga suspek si Ronald at agad nagbunot ng patalim si Albert at sa takot ng biktima tumakbo ito subalit pinukol ng bato ni Philip na naging sanhi ng pagbagsak nito.
Agad na nilapitan ni Albert ang nakadapang biktima at dito na sinaksak ng ilang ulit sa katawan saka sila tumakas habang ang biktima ay dinala sa nasabing ospital.
Sa isinagawang follow-up operation ng mga awtoridad nasakote sina Delgado at si Albert kaya agad dinala sa presinto habang si Philip ay nakalalaya pa.
Patuloy nagsasagawa ng masusing imbestigasyon ang pulisya at inaalam ang tunay na motibo sa insidente.
The post Binatilyo kinuyog, malubha appeared first on Remate.