PINALAYA na ang isang negosyante na dinukot sa Zamboanga Sibugay, mag-iisang linggo na ang nakararaan.
Ayon sa Zamboanga City police office, pasado alas-7:00 kagabi nang lapitan ng biktimang si Viviana Acas, 45, ng Barangay Situboc, Tampilisan, Zamboanga Del Norte, ang mga pulis na naka-duty malapit sa terminal ng bus sa Barangay Guiwan sa Zamboanga City at nagpakilala.
Kaagad na dinala ang biktima sa Zamboanga City police office at isinagawa ang interogasyon sa kanya ng mga pulis.
Ayon sa salaysay ng biktima, puwersahan siyang dinukot noong nakaraang Biyernes habang naghihintay ng masasakyan sa may bus terminal ng Ipil, Zamboanga Sibugay.
Hindi pa rin malinaw sa mga awtoridad kung may kapalit na ransom ang pagpapalaya at kung sino ang nasa likod ng pagdukot.
Isinailalim na sa medical check-up ang biktima bago na-turnover sa kanyang pamilya.
The post Negosyanteng dinukot sa Zambo laya na appeared first on Remate.