PATAY ang isang pulis Quezon City matapos aksidenteng mabaril ng kanyang misis habang nagpapambuno ang dalawa sa isang baril sa loob ng kanilang bahay sa naturang lungsod kaninang madaling-araw, Agosto 21,2013.
Kinilala ang biktima na si PO1 George Verbo, 37, PNP member at nakatalaga sa Quezon City Police District station 5, Lagro.
Si Verbo ay idineklarang dead-on-arrival sa Malvar General Hospital dahil sa isang tama ng bala ng baril sa kanyang tiyan na ikinasawi nito.
Kusa naman sumuko ang misis ng biktima na si PO1 Gemalyn Verbo, 34, miyembro din ng PNP at nakatalaga din sa naturang police station.
Ayon sa ulat ng Quezon City Police District Criminal Investigation and Detection Unit (QCPD-CIDU), naganap ang insidente sa loob ng bahay ng mag-asawang Verbo sa Sampaguita Extension, Brgy. Payatas A, Quezon City dakong 12:45 ng madaling-araw.
Sinabi sa ulat na nakikipag-inuman umano ang biktimang si George (Verbo) sa kanyang bayaw sa kanilang bahay sa Brgy. Payatas A, sa tapat ng kanilang tindahan nang dumating ang asawa nito (suspek).
Nagkaroon umano ng mainitang pagtatalo ang biktima at suspek sa hindi pa mabatid na kadahilanan dahilan para piliting kuhanin ng biktima ang service firearm ng huli sa bag.
Sa puntong ito dito na nagkaroon ng pagpapambuno ang biktima at suspek sa baril hanggang sa pumutok ang baril dahilan para tamaan sa tiyan ang biktima na ikinasawi nito.
Agad isinugod ang biktima sa naturang pagamutan subalit hindi na ito umabot ng buhay.
Nakapiit ngayon ang biktima sa himpilan ng QCPD-CIDU.
The post Pulis QC aksidenteng nabaril ng kanyang misis, patay appeared first on Remate.