NAGBIGTI ang 18-anyos na binata nang maburyong sa walang tigil na pangangantiyaw sa kanya na may kasamang paninisi ng mga kabarkada sa ginawang pag-nguso sa isa nilang katropa na nagnakaw sa ilang paninda sa isang groserya kaninang umaga sa Las Piñas City.
Wala nang buhay nang madiskubre ang biktimang si Manolito Ybanez sa loob ng banyo ng kanilang tirahan sa Blk 19 Lot 13 Dalla St., Phase 3, TS Cruz Subdivision, Almanza Dos, naturang lungsod.
Sa imbestigasyon, alas-6:30 ng umaga nang madiskubre ang biktima ng kanyang ina na si Helen Grace Ybanez, 41, nagbigti gamit ang isang nylon cord na ipinulupot sa leeg at itinali ang kabilang dulo sa kahoy na pinagpapakuan ng kisame.
Ayon sa pulisya, nagsimulang makitaan ng pagkabalisa ang biktima noon pang nakaraang buwan ng Hulyo matapos dakpin at ikulong ang isa nilang kabarkada sa salang pagnanakaw.
Sinisisi ng kanyang mga kaibigan si Ybanez sa pagkakasadlak sa piitan ng isa nilang ka-tropa matapos ikanta ng biktima ang ginawa nitong pagnanakaw sa isang groserya.
The post Naburyong sa kantiyaw, binata nagbigti appeared first on Remate.