HINDI na nagising pa sa mahimbing na pagkakatulog ang isang 31-anyos na stay in helper nang matagpuang wala nang buhay sa pinapasukang bahay sa Sta. Mesa, Maynila kaninang umaga.
Nakilala ang biktima na si Dominador Bignotea, stay in sa Unit 10 4698 Valenzuela St., Sta. Mesa, Maynila na pag-aari ng isang Ismael Caspe.
Ayon kay PO3 Jupiter Tajonera ng Manila Police District (MPD)-homicide section, dakong 6:00 ng umaga nang nadiskubreng patay ang biktima sa sahig sa pinapasukang bahay.
Nabatid naman kay Ismael Caspe, employer ng biktima, huli nitong nakitang buhay ang biktima dakong 10:00 ng gabi habang nakikipag-inuman sa kapwa houseboy na si Leomar Ampuan.
Kilala umano ang biktima na mahilig sa alak na pinaniniwalaang dahilan ng kanyang pagkamatay.
Gayunman, dakong 6:00 ng umaga nang napansin ng 2-anyos na anak ni Ampuan na hindi na gumagalaw ang biktima kaya isinumbong ito sa ama.
Ipinapalagay ni Tajonera na binangungot ang biktima gayunman, patuloy ang isinasagawang imbestigasyon sa pagkamatay ng biktima.
The post Houseboy lumaklak ng alak, tigbak appeared first on Remate.