SABOG ang mukha at ulo ng isang babae nang matagpuang wala ng buhay sa loob ng isang motel kagabi sa Sta. Cruz, Maynila.
Kinilala ang biktima na si Shiela Halili, tinatayang 28-anyos, diumano’y pick-up girl at nanunuluyan sa Casa Novela Inn sa D. Jose St., Avenida, Sta Cruz, Maynila.
Kinilala naman ang suspek na alias Michael, may taas na 5’6, tinatayang may edad sa pagitan ng 35-40 at matipuno ang pangangatawan na kasalukuyang pinaghahanap ng pulisya.
Sa report ni SPO3 Glenzor Vallejo ng MPD-homicide section, dakong 2:50 ng madaling araw nang naganap ang insidente sa loob ng banyo ng Room 15 ng Carport Inn sa Fuguso Lope De Vega St., Sta Cruz, Manila.
Ayon kay Mario Fabillar, roomboy ng nasabing motel, kinatok ang kuwarto ng biktima matapos ang tatlong oras na pagrenta sa kuwarto subalit walang sumasagot dahilan upang gamitan ng duplicate key kung saan natagpuang duguang nakahandusay sa loob ng banyo.
Sinabi ng Vallejo na nag-check in ang biktima kasama ang isang lalalaki na umano’y mahilig kumuha ng mga pick-up girls dakong 11:50 ng hatinggabi, gayunman, hindi napansin ng pamunuan ng motel ang paglabas ng suspek at naiwan ang biktima sa loob.
Narekober sa tabi ng biktima ang isang ga-kamong laki ng bato na hinihinalang ginamit sa pagpatay sa biktima.
Inuugnay ng pulisya ang suspek sa ilang insidente ng pagpatay ng ilang kababaihan na iniiwan sa loob ng motel dahil sa parehas na pattern.
Ang bangkay ng biktima ay kasalukuyang nakalagak sa St. Rich Funeral Homes para sa safekeeping at awtopsiya.
The post Babae natagpuang patay sa loob ng motel appeared first on Remate.