ISANG tulak ng shabu at kasama nitong pulis ang inaresto ng anti-narcotics agents ng Philippine Drug Enforcement Agency (PDEA) sa isinagawang buy-bust operation sa Maasim City, Leyte.
Kinilala ni PDEA Director General Undersecretary Arturo G. Cacdac, Jr. ang mga nahuling suspek na sina Reynaldo Siega, 37 at SPO4 Nicasio Sunit, 52, nakatalaga sa Provincial Anti-Illegal Drugs Special Operations Task Group – Southern Leyte Provincial Police Office (PAIDSOTG- SLPPO) at kapwa residente sa Barangay Asuncion, Maasim City.
Naaresto ang dalawa noong umaga ng September 21, 2013, ng pinagsanib na puwersa ng PDEA Regional Office 8 (PDEA RO 8) at Regional Special Operation Group 8 matapos bentahan ng mga ito ng shabu ang isang PDEA agent na nagkunwang buyer sa buy-bust operation sa Barangay Asuncion, Maasim City.
Nakumpiska sa dalawang suspek ang ebidensiya at tatlong piraso ng tig P1000 na ginamit sa buy-bust.
Dahil dito ang mga suspek ay kinasuhan ng paglabag sa Section 5 (Sale of Dangerous Drugs) in relation to Section 26b (Conspiracy to Sell Dangerous Drugs), Article II of Republic Act 9165, kilala rin bilang Comprehensive Dangerous Drugs Act of 2002.
The post Tulak, parak dakip sa buy-bust operation appeared first on Remate.