KALABOSO ang 35-anyos na ex-US Navy matapos mangholdap ng taxi driver sa Malate, Manila kaninang umaga.
Hawak na ng MPD-General Assignment Section (GAS) ang suspek na si Yaneir Rashan, turista, American national at nanunuluyan sa Bacoor City, Cavite dahil sa reklamo ni Igmedio Eneran, 58, driver ng Bernadine Taxi (UVX-792) ng Blk. 31 Lot 74 Area 2 Dagat-dagatan, Navotas.
Sa report, alas-5:30 ng umaga nang naganap ang insidente sa kanto ng Arellano at Zobel Sts., sa Malate, Maynila.
Sa salaysay ng biktima, sumakay ang suspek sa Harrison sa Vito Cruz at nagpapahatid sa Makati subalit pag-ikot nila sa kanto ng Arellano at Zobel Sts., ay nagdeklara ang suspek ng holdap hawak ang isang jungle bolo.
Hinawi naman ng biktima ang kamay ng suspek saka ibinaba ang hand break na tiyempo namang napansin ang komosyon ng mga barangay tanod na lumapit sa kanila na nagresulta sa pagkakaaresto sa suspek.
Sa pagsisiyasat, expired na ang tourist visa ng suspek noon pang Abril, 2013.
Ipinaalam na rin sa US Embassy ang kinasangkutang insidente ng suspek.
The post Ex-US Navy dakip sa panghoholdap appeared first on Remate.