PATAY ang 27-anyos na lalaki nang pagbabarilin ng hindi pa nakikilalang salarin habang nakatayo ang una malapit sa kanyang tinitirhan kaninang madaling-araw sa Pasay City.
Dead on the spot si Reggie Reyes, ng 2294 F. Victor St., sanhi ng mga tama ng bala sa iba’t ibang bahagi ng katawan.
Inaalam naman ng pulisya ang pagkakakilanlan ng suspek na armado ng kalibre .9mm na baril, nakasuot ng itim na bonnet na agad tumakas matapos ang pamamaril sa biktima.
Sa imbestigasyon, naganap ang insidente alas-2:05 ng madaling-araw sa kahabaan ng F. Victor St. habang nakatayo malapit sa kanilang tirahan ang biktima.
Nagawa pang makatakbo palayo ng biktima nang makita ang papalapit na suspek na nakamaskara ng itim na bonnet subalit hinabol siya hanggang abutan sa kanto ng Tramo at doon pinagbabaril.
Tumakas ang suspek at sumakay sa isang motorsiklong minamaneho ng kanyang kasabwat nang matiyak na wala nang buhay ang biktima.
Inaalam pa ng pulisya kung may kaugnayan ang naturang pamamaslang sa matagal ng alitan sa pagitan ng biktima at ng isang Louie Guinto na nag-ugat sa hindi pagkakaunawaan sa bentahan ng cell phone.
The post Lalaki patay sa pamamaril sa Pasay appeared first on Remate.