HINATULAN kanina, Disyembre 11, 2013 ng 12-taong pagkakabilanggo ng Quezon City Regional Trial Court ang isang lalaki dahil sa pagpatay sa kanyang pinsan matapos mauwi sa away ang kanilang mainitang pagtatalo apat na taon na ang nakalilipas.
Sa apat na pahinang desisyon ni Assisting Judge Genie Gapas-Agbada ng QC Regional Trial Court Branch 221, napatunayang nagkasala nang walang pag-aalinlangan si Robert dela Cruz ng 36-F Sitio Maligaya, Brgy. Bahay Toro, Project 8, QC sa kasong pagpatay.
Ayon sa record ng korte, nag-ugat ang insidente gabi ng Agosto 21, 2009 nang ang akusado at ang kanyang pinsan na si Elbert delas Alas ay nagkaroon ng away malapit sa kanilang bahay.
Sinabi sa testimonya ng ina ng biktima na si Lolita delas Alas matapos si Elbert at ang akusado ay naawat matapos ang mainitang pagtatalo, ang kanyang anak ay pumasok na sa loob ng kanilang bahay subalit si Dela Cruz ay patuloy sa pagsasalita ng mga hindi magagandang laban sa una.
Sumugod ang biktima sa bahay ni Dela Cruz at nakikiusap ang ina nito para maiwasan na magkaroon ng komprontasyon sa akusado subalit naging bingi ito.
Makalipas ang ilang minuto, sinaksak ni Dela Cruz sa likod ang biktima matapos magpang-abot.
Agad isinugod ang biktima sa malapit na ospital subalit binawian ng buhay makalipas ang ilang araw at nadakip naman ang akusado.
The post 12-taon kulong sa pumatay ng pinsan appeared first on Remate.