TUMAGILID sa kalsada ang isang kotse nang suwagin ng drayber nitong babae ang poste ng condominium sa Quezon City kaninang umaga, Disyembre 22.
Nagtamo ng sugat sa kamay sanhi ng nabasag na windshield ang biktimang si Maria Elizabeth Aragon.
Sa ulat, naganap ang insidente alas-9:15 ng umaga sa GA Tower condominium sa North Avenue at Quezon Avenue, QC.
Ayon sa guwardiya ng naturang condominium, napansin nilang tila wala sa kontrol na tumatakbo ang kotse na Honda Jazz ni Aragon.
Hindi nga nagkamali, dahil ilang sandali lamang ay sinuwag na nito ang poste ng kanilang condominium.
Ayon naman sa Metro Manila Development Authority (MMDA) rescue team, mag-isa lamang si Aragon nang kanilang datnan sa tumagilid na sasakyan.
Tumangging magbigay ng pahayag ang driver pero ayon sa mga nakasaksi, posibleng galing ng Christmas party si Aragon dahil sa mga regalong nasa sasakyan nito at inumaga na sa pag-uwi.
The post Kotse tumagilid sa kalsada, driver sugatan appeared first on Remate.