NAGSASAGAWA na ng manhunt operation ang mga tauhan ng Taguig City police laban sa kapitbahay ng 25-anyos na dalaga makaraang pasukin siya nito sa kanilang bahay at pwersahang gahasain kaninang madaling-araw sa Taguig City.
Inatasan ni Chief Insp. Edna Catilogo, hepe ng Taguig police Women and Children’s Protection Desk (WCPD), ang kanyang mga tauhan na arestuhin ang suspek na nakilalang si Amado Omoguis alyas “Eman”, isang karpintero at residente ng Barangay Hagonoy matapos magsampa ng pormal na reklamo ang biktima na itinago sa pangalang “Christina.”
Batay sa salaysay ng biktima kay PO1 Sarah Valderama, may hawak ng kaso, mahimbing siyang natutulog sa kanyang silid nang magising na lamang siya sa mabigat na katawang nakadagan sa kanya dakong ala-1 ng madaling-araw.
Nagtangkang sumigaw ang biktima subalit tinakpan ng suspek ang kanyang bibig at kahit anong pagpupumiglas ay wala siyang nagawa dahil sa sobrang lakas ng suspek hanggang magtagumpay na mailugso ang kanyang puri.
Bagama’t itinatanggi ng suspek ang bintang, sinampahan pa rin siya ng kasong paglabag sa R.A. 8242 o Anti-Rape Law ng pulisya sa Taguig City Prosecutors Office.
The post 25-anyos na dalaga, ni-rape ng kapitbahay appeared first on Remate.