PATAY ang 37-anyos na construction worker nang barilin sa ulo ng hindi pa nakikilalang salarin habang nasa tapat lamang ang biktima ng kanyang inuupahang bahay kagabi sa Taguig City.
Dead on arrival sa Taguig Pateros District Hospital ang biktimang si Joselito Caseres, ng Block 3 Lot 4 SS Brigade, Brgy. Western Bicutan sanhi ng tama ng bala sa kanyang ulo.
Inaalam naman ng pulisya ang pagkakakilanlan ng suspek na agad tumakas matapos ang pamamaslang sa biktima.
Sa ulat, alas-12 ng hatinggabi habang nasa tapat ng kanyang inuupahang tirahan ang biktima ay nilapitan ito ng suspek at walang sabi-sabing pinaputukan ng hindi pa nabatid na kalibre ng baril sa ulo bago mabilis na tumakas.
Hinala ng pulisya na paghihiganti ang motibo sa nangyaring pamamaslang sa biktima makaraang matuklasan na lumipat lamang ng tirahan si Caseres upang takasan ang mga kaanak ng lalaking kanyang napaslang kamakailan.
Batay sa nakalap na impormasyon ng pulisya, napatay ni Caseres ang isang lalaking nambastos sa kanyang mga bisita noon pang 2011 kaya’t nagtago at nanirahan ito sa Brgy. Western Bicutan.
Dahil sa pangyayari, ilang ulit na nakatanggap ng pagbabanta sa kanyang buhay si Caseres na ipinadaraan sa kanyang ina.
Samantala, iniutos na ni Taguig police chief Senior Supt. Arthur Felix Asis ang pagsasagawa ng malalimang imbestigasyon sa kaso habang lumutang din bilang testigo ang isang pamangkin ng napaslang na nakasaksi sa pangyayari.
The post Construction worker, inambus sa harapan ng bahay, patay appeared first on Remate.