PINAGBABARIL ng hindi pa kilalang salarin ang 42-anyos na drug pusher habang nagsusugal ng cara y cruz kaninang madaling-araw sa Parañaque City.
Namatay kaagad sanhi ng mga tama ng bala sa katawan ang biktimang si Edgardo Ricohermoso, ng 6225 Tulip St., Tramo I, Barangay San Dionisio habang mabilis na nakatakas ang salarin patungo sa hindi nabatid na lugar makaraan ang pamamaslang.
Sa imbestigasyon, naganap ang insidente ng pamamaril alas-2:30 ng madaling araw sa eskinita ng Pascua St., Gawad Kalinga, Barangay San Dionisio habang nakikipagsugal ang biktima sa ilang kalalakihan.
Biglang sumulpot ang armadong salarin at walang babala na pinaputukan ng sunod-sunod ang biktima na naging dahilan ng agaran nitong kamatayan.
Ayon naman sa testigong si Michael Bandogan, natutulog na siya nang marinig ang sunod-sunod na putok sa harapan ng kanyang bahay at nang sumilip siya sa bintana ay nakita niya ang duguang biktima na nakalupasay na sa baldosa.
Sa pahayag naman sa pulisya ni Babylyn Ricohermoso, inamin niya na sangkot sa pagtutulak ng ilegal na droga ang kanyang asawa kaya malaki ang posibilidad na may kinalaman ang ilegal nitong gawain sa pamamaslang.
The post Pusher itinumba habang nagsusugal appeared first on Remate.