PATAY ang isang estudyante makaraang pagbabarilin ng riding-in-tandem matapos maghatid ng pagkain sa kanyang ina sa Quezon City kaninang tanghali, Enero 30, 2014.
Kinilala ang biktima na si Archie Cabuhat, 20, ng 190 Golden Shower St., Brgy. Payatas, QC.
Si Cabuhat ay namatay noon din dahil sa tama ng bala ng baril sa kanyang katawan.
Ayon kay Police Aide Myrna Millan ng Quezon City Police District station 6 Batasan, naganap ang insidente sa Payatas Road cor. Mapang-akit St., QC, alas-12:30 ng tanghali.
Sinabi sa ulat na naglalakad ang biktima sa naturang lugar matapos maghatid ng pagkain ng kanyang ina nang biglang sumulpot ang dalawang lalaki na naka-helmet sakay ng motorsiklo na walang plaka.
Agad pinagbabaril ng isa sa mga suspek ang biktima na ikinamatay nito noon din.
Tumakas ang mga suspek matapos ang pamamaril at kasalukuyan ngayong pinaghahanap ng mga pulis.
The post Estudyante patay sa riding in-tandem appeared first on Remate.