PATAY ang isang lola habang kritikal ang sinasabing magnanakaw matapos tamaan ng ligaw na bala ang una nang makipagbarilan ang huli sa dalawang pulis sa terminal ng bus sa Caloocan City, Miyerkules ng gabi, Marso 12.
Dead on the spot sanhi ng tama ng bala sa leeg si Rebecca Sapelino, 60, ng Calumpit, Bulacan.
Inoobserbahan naman sa Caloocan Medical Center sanhi ng tama ng bala na tumagos sa dibdib ang suspek na si Elmer Orfano, 18, ng Olongapo City.
Sa pahayag ng saksing si John Navarro, alas-3:44 kahapon ng hapon nang makatanggap siya ng tawag sa cellphone mula sa kanyang ina na nasa Olongapo at sinabi na napasok sila ng magnanakaw kung saan natangay ang dalawang cellphone ng kanyang kapatid na babae.
Sinubukang tawagan ni Navarro ang isa sa nawawalang cellphone subalit walang sumasagot hanggang sa i-text na lamang ng una ang nasabing cellphone.
May sumagot sa text at nagkasundong tutubusin na lang ni Navarro ang cellphone hanggang sa magkasundong magkita sa Bus Terminal ng Victory Liner sa Monumento ng lungsod.
Nauna sa Terminal si Navarro kung saan nang makita ang mga pulis na sina PO1 Cris Robert Castro at PO1 Jayson Gargarena ay humingi ng tulong at pagsapit ng alas-7:30 ng gabi ay nag-text ang suspek na nasa Terminal na rin.
Nang makita ng suspek na may kasamang pulis si Navarro ay naglabas ng baril at pinutukan ang dalawang pulis na naging dahilan upang gumanti at matapos ang palitan ng putok ay tinamaan si Orfano subalit nahagip din ang nasawi na nasa malapit sa lugar ng pinangyarihan.
Dinala ang suspek sa CMC kung saan nabawi ang Daewoo .9mm, dalang bag na naglalaman ng granada, mga bala, SM Advantage card ni Graciela Navarro at IPhone 5.
Inaalam na ng mga pulis kung kaninong bala ang tumama sa nasawi.
The post Lola patay sa ligaw na bala sa Caloocan appeared first on Remate.