NAKULIMBAT sa isang pamilya ang mahigit P1 milyong halaga ng pera at alahas nang umatake sa kanilang bahay ang mga miyembro ng Gapos Gang sa Quezon City kaninang umaga, Marso 18.
Sinabi ng Quezon City Police District (QCPD) station 11, na walong minuto lamang ang kinailangan ng may pitong suspek para makapasok ng bahay, igapos ng nylon cord ang may sampung miyembro ng pamilya bago i-ransack ang pera, alahas at iba pang mamahaling gamit sa kuwarto ng mga biktima.
Hinahanting na ngayon ng operatiba ng Kamuning police station ang mga suspek na tumakas sakay sa dalawang motorsiklo at isang kotse.
Sa ulat, naganap ang insidente alas-7 ng umaga sa mismong bahay ng mga biktima sa Brgy. Immaculate Concepcion, Cubao, QC.
Nabatid na bago ito ay lumabas sa kanilang bahay ang 15-anyos na miyembro ng pamilya na hindi pinangalanan para pumasok sa eskuwelahan.
Dahil naiwan ng dalagitang bukas ang kanilang gate, sinamantala ito ng dalawa sa mga supek at pumasok agad sa bahay ng kanilang bibiktimahin.
Dalawa pang suspek ang sumunod at may apat pang dumating na nagtulong-tulong para maigapos ang mga biktima bago hinalughog ang kabahayan.
Nang makuha na ang pakay, tumakas ang mga suspek habang tumawag naman ng tulong sa awtoridad ang isa sa mga biktima na nakawala sa pagkakagapos.
The post Gapos gang nakabulsa ng P1M sa QC heist appeared first on Remate.