KASONG attempted arson ang isinampa ng pulisya laban sa lalaking nagtangkang sunugin ang bahay ng kanyang karibal sa pag-ibig noong nakaraang linggo sa Taguig City.
Kasalukuyang nakakulong sa detention cell ng pulisya si Renato Bianzon, Jr. , nasa hustong gulang ng Cavite city matapos madakip ng pulisya nang tangkain nitong silaban ang bahay ng kanyang karibal na si Johnny Valdez sa Orchid St., Katipunan Village, Western Bicutan noong Biyernes ng gabi.
Sa ulat ng pulisya, magkasabay na nanligaw sa iisang babae na itinago lang sa pangalang Edith ang suspek at si Valdez subalit pinili ng dalaga ang huli dahilan ng kawalan ng trabaho ng una.
Sa ulat Taguig police, bago nangyari ang tangkang panununog noong Biyernes ng gabi ay nahuli pa ni Valdez si Bianzon na umaaligid sa kanilang bahay alas-8 ng umaga kaya’t humingi siya ng ayuda sa mga barangay tanod. Nang kapkapan si Bianzon, nakuha sa kanya ang isang patalim subalit mabilis na nakatakas bago pa madakip.
Bumalik umano kinagabihan si Bianzon sa bahay ni Valdez na may bitbit nang timba na may lamang tela at gasolina bago sinindihan at inihagis sa loob ng bahay ng karibal.
Agad na nagliyab ang dingding at ng kisame ng bahay ni Valdez ngunit dahil sa mabilis na pagresponde ng mga kapitbahay ay agad naapula ang apoy.
The post Nagtangkang sunugin ang bahay ng karibal timbog appeared first on Remate.