PAGGAMIT ng nakalalasong kemikal ang motibo sa pamamaril sa isang barangay tanod sa Bgy. 6, San Leandro, Sarrat, Ilocos Norte, ng hindi pa nakilalang suspek.
Kinilala ang biktima na si Maximo Ganal, 53, barangay tanod sa nabanggit na barangay.
Ayon sa inisyal na imbestigasyon, naganap ang insidente nang magtungo ang biktima kasama ang misis sa bukid upang manguha ng damo para sa kanilang mga alagang hayop.
‘Di kalayuan, bigla na lamang nakarinig ang misis ng biktima na si Delia Ganal ng tatlong putok na inakala niyang paputok lamang ngunit nang tingnan, ang kanyang asawa pala ang tinamaan.
Dahil sa takot ay nagtatakbo para magpasaklolo.
Nakuha ng mga awtoridad ng apat na basyo ng kalibre 45 na baril sa pinangyarihan ng pamamaril.
Lumalabas sa imbestigasyon na dalawang bala ang tumama sa ulo ng biktima at isa sa kaliwang bahagi ng kanyang dibdib na tumagos sa kanyang tiyan na dahilan ng kanyang kamatayan.
Nabatid na sa mga nakaraang araw ay may nakaaway ang biktima hinggil sa lupa at paggamit ng kemikal sa bukid na ikinamatay ng kanyang mga tanim na mais.
The post Tanod inutas sa harapan ng misis sa Ilocos appeared first on Remate.