NASAKOTE ng mga awtoridad ang isa pang miyembro ng Abu Sayyaf Group (ASG) na responsable sa serye ng pagdukot sa Basilan.
Sa pangunguna ng Special Anti-Kidnapping Task Force ng PNP sa pamamagitan ni C/Supt. Agrimero Cruz Jr., nasakote ang rebelde na kinilalang si Ameng Alam Sirul, alyas Rajang sa bisa ng arrest warrant sa Barangay Bulan-Bulan sa Lamitan, Basilan.
Kasama sa Lamitan siege si Rajang at siya pang itinuturong dumukot sa 16 na guro sa Isabela City noong 1994.
Sangkot din ito sa pag-ambush at pagpatay sa tatlong trabahador ng coconut plantation sa Lantawan, Basilan, 2011.
Sinubukan pang manlaban ni Rajang nang arestuhin pero napigilan ito at maging ang tangkang pagtulong ng mga kapitbahay.
Agad na dinala sa Zamboanga City ang suspek para maiharap sa korte.
Sinasabing isa si Rajang sa mga iniligtas ng mga kasamahan noong 2007 sa Cotabato kasama si Khair Mundos na naaresto naman sa Parañaque kamakailan lamang.
The post Miyembro pa ng ASG, nasakote sa Basilan appeared first on Remate.