PATAY na nang matagpuan ang isang 7-taong-gulang na lalaki matapos anurin ng tubig sa estero de mapua habang naliligo sa kasagsagan ng malakas na ulan kahapon sa Sta.Cruz, Maynila.
Alas-3 ng madaling-araw nang makuha ang bangkay ng biktimang si Leonard Pinopio, nakatira sa Blumentritt, Sta. Cruz, Maynila.
Nauna rito, naligo umano ang biktima kasama ang dalawa pang kaibigan sa estero de Mapua habang kasagsagan ng malakas na ulan kahapon nang anurin ito.
Nagawa pa umanong makakapit ang biktima sa pader ng estero subalit nakabitaw din ito hanggang tuluyang tangayin ng malakas na agos ng tubig.
Nabatid na inabot nang 12-oras ang paghahanap sa biktima ng mga rescue team.
Limang araw na rin umanong hindi umuuwi ang bata sa kanilang bahay sa Blumenritt ngunit hindi naman akalain ng kanyang kaanak na inanod ito sa estero.
The post 7-anyos inanod ng baha, patay appeared first on Remate.