NATIGBAK ang isang pulis habang sugatan ang kasamahan nito nang saksakin ng gunting ng lalaking may diperesnya sa pag-iisip na kanilang inaresto sa Cebu, Lunes ng umaga.
Dead on arrival sa ospital ang biktima na si P01 Ryan Saturnino, 27-anyos ng Barangay Canduman, Madaue City, dahil sa tinamong saksak sa katawan. Sugatan din ang si P01 Melson Silao, kasamahan ng nasawi. Ang dalawa ay parehong miyembro ng Manadue police station.
Nagtamo rin ng tama ng bala sa katawan ang suspek na si Jonathan Cordero, 42-anyos, residente ng Barangay Esperanza, Pilar City.
Naganap ang insidente dakong alas-9:34 ng umaga sa Sitio Purok Palmera, Barangay Esperanza sa lungsod ng Pilar sa Camotes, Cebu.
Bago ito, humingi ng tulong si Barangay Councilor Miguel Silao sa dalawang biktima dahil pinagpapalo siya ni Cordero nang sitahin niya itong nagtatapon ng basura sa tapat ng kanyang bahay.
Sa pagrespode ng dalawang pulis, nahuli naman agad si Cordero pero nang dadalhin na ito sa presinto ay nailabas nito sa bulsa ang kanyang dalang gunting at pinagsasaksaksak sina Saturnino at Silao.
Nakuha pa ni Saturnino ang kanyang baril at nabaril pa si Cordero.