NAGMISTULANG punching bag ang isang 36 anyos na lalaki matapos itong pagtulungang bugbugin ng isang pulis at kanyang utol sa basketball court kagabi sa Tondo, Maynila.
Personal na nagreklamo ngayon sa Manila Police District General Assignment Section ang biktimang si Christopher David, 36, ng 761 Favia St. Tondo, Maynila.
Kinilala naman ang abusadong pulis na si PO2 Jeffrey Laus, nakatalaga sa MPD-PS1, 32 at kapatid na si Jayco.
Ayon sa biktima, ganap na alas 6:30 kagabi ng dadaan ito sakay ng kanyang motorsiklo sa may basketball court at upang hindi magambala si Laus at utol nito sa paglalaro ng basketball ay huminto muna siya sa paglalakad.
Isang hindi tinukoy na lalaki ang umano ay nagpa-go sa biktima kaya pinaandar niya ang kanyang motorsiklo lulan ang kanyang anim na taong gulang na anak na babae.
Nang nasa gitna na umano ng kalsadang court si Laus, sinabihan umano siyang “para kang di taga Favia “ at sinagot naman niya na “huminto naman ako ah”.
Tinangka umano ng biktima na kausapin ang pulis at pagbaba niya sa motorsiklo ay kaagad siyang sinapak at pinagtulungan ng magkapatid.
“Akala siguro niya e aawayin ko siya, kaya inunahan ako, pano ko gagawin yong e kaangkas ko sa likod yong 6 taong gulang kong anak na babae, marami na ang galit
diyan pati mga bata sa amin binabatukan niya, pulis pa naman siya tapos ganon ang ugali niya,” ayon sa biktima.
Sa Lunes ay nakatakdang magharap ang mga suspek at biktima sa tanggapan ng MPD-GAS upang matukoy ng pulisya ang pananagutan ng bawat isa.