SA MISMONG ari ng isang dalaga tumusok ang isang putol na punong-kahoy na may habang 12 pulgada nang malaglag ito mula sa pangunguha ng bunga ng makopa sa Iloilo, Sabado ng umaga.
Dahil sa dami ng dugo na lumabas sa katawan ng biktima na itinago sa pangalang Ethel, 22-anyos, isang college student ng isang kilalang kolehiyo sa Iloilo City, ay kinailangan siyang salinan ng dugo.
Sa ulat, naganap ang insidente sa isang puno ng makopa na nakatirik malapit sa kanilang bahay sa Barangay Sta. Barbara, Iloilo.
Inakyat ng biktima ang naturang puno dahil hitik ito sa bunga. Subalit minalas itong makaapak nang marupok na sanga kaya nahulog mula sa puno na tinatayang may taas na apat hanggang limang metro.
Sa kamalasan pa ulit, bumagsak ang dalaga sa natirang putol na punong-kahoy sa lupa at sumentro ito sa mismong ari niya.
Bagamat nakasuot ng maong shorts ang biktima ay tumagos pa rin ang kahoy na may 12 pulgada ang haba o kasingsukat ng isang ruler at halos kasinlaki ng braso ng tao.