KRITIKAL ang 42-anyos na security guard nang pagsasaksakin ng kanyang bayaw nang paghinalaan siyang pinagtataksilan ang kanyang kapatid nito kagabi sa Pasay City.
Kasalukuyang ginagamot sa Pasay City General Hospital ang biktimang si Filipino Baronggo, ng 182 Saint Francis St., Maricaban sanhi ng mga tama ng saksak sa iba’t-ibang bahagi ng katawan habang pinaghahanap naman ng pulisya ang bayaw nito na si Wendel Ando, driver at naninirahan din sa naturang lugar.
Sa imbestigasyon, nag-iinuman ang biktima at suspek kasama ang dalawa pang kaibigan sa harapan ng kanilang bahay alas-7:30 ng gabi nang maungkat ang hinalang pambababae ng biktima.
Pinagsabihan ng suspek ang bayaw sa harap ng kanilang mga kaibigan na huwag lolokohin ang kanyang kapatid na hindi naman nagustuhan ng biktima at iginiit na hindi niya pinagtataksilan ang asawa hanggang sa mauwi ang pagtatalo sa pagsusuntukan.
Naawat naman ang pambubuno ng dalawa subalit nang pumasok na sa kanyang silid si Baronggo, pinasok siya ng bayaw na armado na ng patalim at inundayan ng saksak.