SAN NARCISO, QUEZON— Makalipas ang halos tatlong taong pagtatago, naaresto kahapon ng mga pulis ang pangalawa at pangatlong most wanted ng bayan sa Sitio Makuyo Kuyo, Barangay White Cliff, bayang ito.
Kinilala ni Quezon police director Senior Supt. Dionardo Carlos ang mga nahuli na sina Santiago Medenilla, 53 at Anisa Medenilla, 26, kapwa magsasaka at residente ng Barangay Punta.
Ayon sa ulat na isinumite kay Calabarzon police director, Chief Supt. Benito Estipona, sinabi ni Carlos na ang mga suspek na parehong nahaharap sa kasong murder at frustrated murder ay naaresto sa bisa ng warrant of arrest na ibinigay ni Gumaca Regional Trial Court, Branch 61 Judge Chona Pulgar-Navarro.
Aniya ay sinurpresa ng kapulisan ang mga suspek habang natutulog sa loob ng kanilang safe house dakong ika-10:30 ng umaga.
Sinabi pa ni Carlos na ang mga suspek ay inaakusahan ng umanoy pagbaril at pagpatay sa isang Jose Menchero at pagkasugat ng kasamahan nitong si Arnel Cajalino noong Agosto 14, 2010.
Ang mga suspek na mula noon ay nagtago sa ibang lalawigan ay kinasuhan ng murder at frustrated murder at tinaguriang ikalawa at ikatlong most wanted ng bayan, aniya.
Ang dalawa ay kasalukuyang nakakulong sa municipal lock-up jail ng bayang ito.
Sinabi ni Carlos na ang pagkakaaresto ng dalawa ay resulta ng pinaigting na Manhunt Bravo na kanilang inilunsad sa buong lalawigan ayon na rin sa deriktiba ni Estipona.