PINAGTATAGA ng isang may diperensya sa pag-iisip ang kanyang kapitbahay na dalagita sa Tacloban City kaninang hapon.
Nagtamo ng taga sa iba’t ibang parte ng katawan at namatay noon din ang biktima na si Arbielyn Morillo, 15, ng Sitio Lahaw, Barangay San Antonio.
Habang tumatakas naman ang suspek na si Jory Tamayo, 60, ay hinabol siya ng isang hindi nakilalang lalaki at maya-maya ay natagpuan na lamang na patay na may 100 metro ang layo mula bahay ng pamilya Morillo.
Sa ulat, naganap ang insidente ala-1:15 ng hapon sa loob ng bahay ng pamilya Morillo.
Sa imbestigasyon ng Palo PNP, bago ang insidente ay pumasok ang suspek sa bahay ng pamilya Morillo at sa hindi malamang dahilan ay tinaga ang tatay ni Arbilyn na si Ariel Morillo.
Bagama’t sugatan, nakalabas pa rin ito sa kanilang bahay at maging ang kanyang misis.
Pero naiwan naman ng mag-asawa ang anak na si Arbielyn na siyang pinagdiskitahan ni Tamayo na pagtatagain hanggang sa mamatay.
Matapos ang pananaga, lumabas ang suspek sa bahay ng dalagita pero biglang itong pinagsasasaksak ng hindi nakikilalang lalaki.