NILINAW ni Pangulong Rodrigo Roa Duterte na nailigtas ng special operations ng special rangers si Father Chito Suganob at hindi ito pinakawalan o pinalaya dahil sa ano pa mang kadahilanan o sa pamamagitan ng back channel talk.
Binigyang diin nito na hindi naniniwala si Pangulong Duterte sa ganitong paraan.
Tiniyak ni Pangulong Rodrigo Roa Duterte na tuluyang matitigil ang giyera sa Marawi City kapag napatay na ang kahuli-hulihang terorista roon.
Aniya, imposibleng matuldukan ang giyera sa Marawi hangga’t may nakatayong terorista at nakikipaglaban sa tropa ng pamahalaan.
Hindi napigilan ng Pangulong Duterte ang mainis sa nabalitaan niyang ilang beses na ginahasa ang mga kababaihang bihag ng Maute group.
Labis-labis ang pasasalamat at tuwa ng Simbahang Katolika sa pagkakaligtas kay Father Chito Suganob at isa pang bihag ng lokal na teroristang Maute group makaraan ang mahigit sa 100 araw na digmaan sa Marawi City.
Sinabi ni Iligan Bishop Elenito Galido na ang pagkakabawi kay Father Suganob ay isang magandang pagsalubong ng Panginoon kina Marawi Bishop Edwin dela Peña, Cagayan de Oro Archbishop Antonio Ledesma at Cotabato Archbishop Orlando Cardinal Quevedo na pauwi mula sa Roma.
Pinuri at pinasalamatan nito ang mga sundalong nagligtas kay Suganob at sa isang bihag na guro.
Itinuturing ng nasabing obispo na “good news at answered prayers” ang pagliligtas sa dalawang bihag ng Maute. KRIS JOSE