TAGUIG CITY– SA pamamagitan ng baril, sapilitang pinababa at tinangay ng riding-in-trio ang isang estudyante na nagmamay-ari ng white Yamaha Mio na may plakang PT 1547 habang binabagtas ang kahabaan ng C6 Road, Barangay Hagonoy, Linggo ng tanghali ayon sa ulat ng NCRPO Regional Public Safety.
Sa salaysay ng biktima na si Lowell Jay Salazar, ng 653 Dr. A. Natividad Street, Barangay Ibayo Tipas, Taguig City, ala-1:00 ng tanghali nang harangin ang kanilang dinaraanan ng tatlong armadong kalalakihan na pawang nakasakay sa isang itim na motorsiklo.
Dalawa sa tatlong suspek ang agad na bumaba at nanutok ng baril dahilan upang pangunahan ng takot at ‘di na magawang lumaban ng biktima kasama ang kaibigan na si Marlon Mendoza.
Matapos isakatuparan ang balak ay sinakyan ng mga ‘di nakilalang suspek ang motorsiklo ng biktima at mabilis na pinatakbo patungong Barangay Lower Bicutan.
Agad namang humingi ng tulong sa awtoridad ang mga biktima.