KULONG ang isang Koreano nang makumpiskahan ng mahigit isang kilo ng marijuana Sta. Ana, Maynila sa isinagawang buy bust operation.
Kinilala ni P/Supt. Olivia Sagaysay, hepe ng MPD-Station 6 (Sta. Ana) ang naarestong suspek na si Sunghyun Kim, 25, binata, turista, pansamantalang nanunuluyan sa 515 Altiva Cypress Tower, Taguig City.
Nabatid na dakong alas -12 ng tanghali nang magsagawa ng buy-bust operation ang pulisya sa pamumuno ni S/Insp. Rommel Purisima laban sa suspek sa New Panaderos St., Sta. Ana kung saan nakuha ang pinatuyong dahon ng marijuana.
Ayon kay Sagaysay, umabot sa isang kilo at tatlo pang plastic sachet na naglalaman din ng mga nasabing iligal na droga na tinatayang aabot sa 1.25 kilos ng marijuana ang nakumpiska sa dayuhang suspek na nagkakahalaga sa mahigit P35,000 street value nito.
Nahaharap sa kasong paglabag sa RA 9165 (Dangerous Drug Act) si Kim na kasalukuyang nakakulong ngayon sa MPD-Station 6.
Ipinagbigay na rin sa Korean embassy ang pagkakaaresto ng suspek. JOCELYN TABANGCURA-DOMENDEN